Պատմության հայկական օրը. հունիսի 30

armenlur / Հայեր 347 / 20:00 / 29.06.2022

ԱՅՍՕՐ ՀԱՅԱՍՏԱՆՈՒՄ ՆՇՎՈՒՄ

Ս. Թեոդիտոն Գաղատացու, Ս. Թալիլյա բժշկի և 7 կույսերի հիշատակության օրը (Հայ Առաքելական Եկեղեցի)

Ս. Թեոդիտոն Գաղատացին Դիոկղետիանոս կայսեր հալածանքների զոհերից է: Լինելով գինեվաճառ, պակաս կասկածելի է թվում հալածիչներին, ինչի շնորհիվ կարողանում է ամեն կերպ օգնության հասնել հալածյալ քրիստոնյաներին. գինի է մատակարարում Սուրբ Խորհրդի համար, հողին է հանձնում նահատակների մարմինները և այլն: Երբ Գաղատիայի կուսակալի հրամանով ջրասույզ են արվում Տեկուսա, Աղեքսանդրա, Կղոիդա, Փեննա, Եվփրասիա, Մատրոնա և Հուղիտա յոթ քրիստոնյա կույսերը, որոնց թվում էր նաև Թեոդիտոնի մորաքույրը, Թեոդիտոնն այլ քրիստոնյաների օգնությամբ կարողանում է գաղտնի ջրից դուրս բերել խորտակվածներին ու թաղել: Սակայն կատարվածը հայտնի է դառնում, և հալածանքներն ընդդեմ քրիստոնյաների առավել սաստականում են: Իր հավատակիցներին փրկելու համար Թեոդիտոնը հանձնվում է կռապաշտներին ու ամենածանր տանջանքների ենթարկվելուց հետո գլխատվում: Ս. Թեոդիտոնի և յոթ կույսերի հիշատակը Հայ Առաքելական եկեղեցում տոնում են միասին Հոգեգալստյան երրորդ շաբաթվա հինգշաբթի օրը:
Նույն օրը Ս. Թալիելյա բժշկի հիշատակության օրն է: Դիմանալով ամենաանմարդկային տանջանքների, երանելի սուրբն իր հավատի ամրությամբ դարձի է բերում անգամ իր դահիճներին: Նրան նետում են ծովը, որտեղից փրկվում է աստվածային հրաշքով և նահատակվում է՝ գլխատվելով:
Այս տոնը հանդիպելու է հետևյալ ամսաթվերին՝ 2022-06-30, 2023-06-22, 2024-06-13, 2025-07-03, 2026-06-18, 2027-06-10, 2028-06-29, 2029-06-14, 2030-07-04։

ԻՐԱԴԱՐՁՈՒԹՅՈՒՆՆԵՐ ՀԱՅԱՍՏԱՆԻ ԵՎ ՀԱՅԵՐԻ ՇՈՒՐՋ

2019 - Հայկական կողմը հաղորդեց Տավուշում և Ղարաբաղում վիրավորված երկու զինվորների մասին։

Հայաստանի պաշտպանության նախարարության խոսնակը «Ազատության» հետ զրույցում նշել էր՝ նախորդ ամիսների համեմատ սահմանին կրակոցների թիվն ավելացել է, հակառակ կողմից նաև ինժիներաշինարարական աշխատանքներ են նկատվում: Վարչապետ Փաշինյանը պաշտոնավարման մեկ տարին ամփոփող ասուլիսում հայտարարել էր՝ Ադրբեջանի նախագահի հետ հաստատված ուղիղ կապի միջոցով փորձելու է հասկանալ՝ինչ է կատարվում:

2011 - Լևոն Տեր-Պետրոսյանը զգուշացնում է իշխանությանը, որ երկխոսություն սկսելու ողջամիտ ժամկետն ավարտվում է։
2011 - Արվեստագետների «Արտլաբորատորիա» խումբը նախագահ Սերժ Սարգսյանի ծննդյան տարեդարձը շնորհավորում էր տորթով, որի վրա մեկ բառ էր գրված՝ Հեռացիր։
2001 - Արամ Սարգսյանը թերահավատությամբ է խոսում հոկտեմբերի 27-ի հանցագործության բացահայտման հավանականության մասին։
1999 - «Օրագիր» օրաթերթի խմբագրապետ Նիկոլ Փաշինյանը հերթական անգամ հրավիրվում է դատախազություն։

Այս անգամ նրա նկատմամբ հայց ներկայացրած քաղաքացին Արտաշես Գեղամյանի տիկինն էր։ Թերթի մի հրապարակմամբ պնդվել էր, թե տիկինը փորձել է մաքսանենգ ճանապարհով ոսկի դուրս բերել Հայաստանից:

1995 - Օպերայի և բալետի ակադեմիական թատրոնի շենքում կայացավ հայ էստրադայի աստղերի «Իրապես ցավակցել կարող է նա, ով վերապրել է» խորագրով բարեգործական համերգը, որի ողջ հասույթը հատկացվեց Սախալինի երկրաշարժից տուժածների հիմնադրամին։

7,5 բալանոց այդ երկրաշարժին զոհ էր գնացել 1841 մարդ։ Հարյուրավոր հայաստանցիներ մասնակցեցին բարեգործական համերգին՝ ձեռք բերելով տոմսերը մեկուկես դոլար գնով։
Բացի տոմսերի վաճառքից՝ տեղում կազմակերպված հանգանակությամբ հավաքվեց ավելի քան 5 մլն դրամ։

1993 - Հեյդար Ալիևը Սուրեթ Հուսեյնովին նշանակեց վարչապետի պաշտոնում։

ԱՅՍՕՐ ԾՆՎԵԼ ԵՆ

1983 - Անջելա Սարաֆյան (ծնվ. Հայաստան), ամերիկահայ դերասանուհի
1954 - Սերժ Սարգսյան (ծնվ. Ստեփանակերտ), ՀՀ 3-րդ նախագահը
1922 - Ժակ Իխմալյան (ծնվ. Ստամբուլ, մ. 1978), հայ նկարիչ, լրագրող

Հայ միջնադարյան մանրանկարչության և դիմանկարային գեղանկարչության, ուղղափառ և կաթոլիկ սրբազան արվեստի ավանդույթների կողքին նկարչի ստեղծագործության վրա ազդեցություն են ունեցել նաև ֆրանսիացի իմպրեսիոնիստների և ֆովիստների նորարարական ձեռքբերումները: Առանձնանում է սերը Պիկասոյի և հատկապես Մատիսի նկատմամբ։

1839 - Դավիթ Աբրահամովիչ (ծնվ. Տորգովիցա, մ. 1926), Ավստրո-հունգար և լեհ հայազգի քաղաքական գործիչ, բարերար