Հիշարժան և տոն օրեր, ապրիլի 11

Տոներ 11.04.2021   09:00   172

Միջազգային

Պարկինսոնի հիվանդության դեմ պայքարի համաշխարհային օրը (World Parkinson’s Day)

  • Ապրիլի 11-ը Պարկինսոնի հիվանդության դեմ պայքարի միջազգային օրն է: Երկու հարյուր տարի առաջ անգլիացի բժիշկ Ջեյմս Պարկինսոնն առաջինը նկարագրեց այս հիվանդության ախտանշանները, որը հետագայում կոչվեց Պարկինսոնի հիվանդություն: Չնայած, որ այս հիվանդությունն ուսումնասիրվում է երկար տարիներ, այն մինչ օրս համարվում է անբուժելի հիվանդություն: Ինչպես նշել է Պարկինսոնը՝ սա քրոնիկական զարգացող հիվանդություն է, որն ախտահարում է կենտրոնական նյարդային համակարգը:
  • Պարկինսոնի հիվանդության դեպքում խանգարվում է գլխուղեղի աշխատանքը և ոչնչանում են դոֆամինի արտադրության համար պատասխանատու հատվածների նեյրոնները: Դոֆամինն ուրախության ու հաճույքի համար պատասխանատու հորմոն է, որը նաև կարգավորում է շարժումները, որոշումներ կայացնելու, սովորելու և մտապահելու գործընթացները:
  • 4 փաստ Պարկինսոնի հիվանդության մասին
  • 1. Տարածվածությամբ երկրորդ նեյրոդեգեներատիվ հիվանդությունն է

    2. Պարկինսոնի հիվանդությունը «երիտասարդացող» հիվանդություն է
    Այս հիվանդությունը համարվել է «մեծահասակների հիվանդություն», քանի որ ախտանշանները սովորաբար ի հայտ էին գալիս 60 տարեկանից հետո, սակայն վերջին տարիներին այն ավել ու ավելի հաճախ է ախտորոշվում 40 տարեկան և անգամ ավելի երիտասարդ մարդկանց մոտ:
    3. Ախտանշանները կարող են «կուտակվել» տասնամյակների ընթացքում
    Հիվանդության վառ ախտանշանն է մի ձեռքի դողը հանգստի վիճակում: Հաջորդ փուլում սկսում են դողալ նաև մյուս ձեռքն ու գլուխը: Ավելի ուշ փուլերում հիվանդությունը դրսևորվում է կոպերի և/կամ ստորին ծնոտի ու լեզվի դողով:
    4. Հնարավոր չէ բուժվել, սակայն կարելի է շարունակել աշխատել
    Պարկինսոնի հիվանդությունը հնարավոր չէ բուժել, քանի որ վնասված նեյրոնները չեն վերականգնվում:
  • Ամենատարածված նեյրոդեգեներատիվ հիվանդությունն Ալցհեյմերի հիվանդությունն է, որին հաջորդում է Պարկինսոնի հիվանդությունը: Վիճակագրական տվյալներով՝ աշխարհում այս հիվանդությունից տառապում է 7-10 միլիոն մարդ՝ այդ թվում նաև բազմաթիվ հայտնի անձինք:

Առաքելական (Հայաստան) - Կրկնազատիկ (Նոր կիրակի) 

  • Այս օրը երբեմն կոչվում է «Նոր կիրակի», երբեմն էլ՝ «Կրկնազատիկ», քանզի նոր և չքնաղ է այդ տոնի խորհուրդը: Նոր է, որովհետև սկիզբն է նոր արարածների: Նոր է կոչվում և գարունը, քանզի հաջորդելով ձմռանը՝ սկսում է արարածների նորոգությունը, և մեռած կերպարանքով ծառերը վերստին ծլարձակում են: Բնությունն ամեն տարի նորոգվում է չորս եղանակներով. գարնանը ծնվում է, ամռանն աճում և հասնում կատարելության, աշնանը ծերանում և ձմռանը մահանում՝ հաջորդ գարնանը վերստին նորոգվելու համար: Դրանով նկարագրվում է մեր հարության խորհուրդը: Եթե գարնանը բնությունը նորոգվում է հնությունից, ապա Եկեղեցին առանց հնանալու է նորոգվում, քանզի Եկեղեցին չի հնանում ու ծերանում, այլ Քրիստոսով կատարյալ է մնում:
  • Արդ՝ նոր ասելով նոր կյանքն ի նկատի ունի, քանզի Քրիստոսով ամեն ինչ վերստին նորոգվեց, հինն անցավ և ամեն ինչ նոր եղավ (տես Բ Կորնթ. 5:17): Նոր եղավ նաև Եկեղեցու խորհուրդը, որը հավիտյան ծածկված էր Աստծո մոտ, և այժմ հայտնվեց Իր սրբերին, և Եկեղեցու միջոցով երկնային իշխանություններին ու պետություններին (տես Կողոս. 1:26, Եփես. 3:9-10): Նոր է և Եկեղեցու պատիվը, որի մասին առաքյալն ասում է, որ ուրախ է այն չարչարանքների ու նեղությունների համար, որ կրում է իր մարմնով (Կողոս. 1:24): Նոր է նաև Եկեղեցու պաշտոնը, քանզի ճշմարիտ երկրպագությունն այն է, երբ Հորը երկրպագում են հոգով ու ճշմարտությամբ, քանզի Հայրն այդպիսի երկրպագություն է փնտրում (տես Հովհ. 4:23): Նոր է և Եկեղեցու հոգևոր և վերստին ծնունդը, որը մարգարեն նախապես տեսնելով ասաց. «Ո՞վ է լսել, ո՞վ է տեսել այսպիսի բան, որ երկիրը մեկ օրում ծննդաբերի, և միանգամից մի ամբողջ ազգ ծնվի. քանզի Սիոնը երկունքի ցավով բռնվեց և ծնեց իր մանուկներին» (Եսայի 66:8): Նոր է և Եկեղեցու սուրբ Սեղանի խորհուրդը և փառքը, քանզի այլևս չի ներկվում նոխազների արյամբ, այլ ամբողջովին ներկված է Աստծո Օծյալ Որդու կենարար Արյամբ: Նոր է և Եկեղեցու «պետության» կարգը՝ ըստ այս խոսքի. «Ձեզնից կվերցվի Աստծու արքայությունը և կտրվի այն ազգին, որ պտղաբեր կդարձնի այն» (Մատթ. 21:43): Նոր է նաև Եկեղեցու «քրիստոնյա» անունը, ինչն Աստված նախ մարգարեին խոստացավ. «Իմ ծառաներին նոր անուն պիտի տրվի, որը պիտի օրհնաբանվի երկրի վրա» (Եսայի 65:15): Նոր է Եկեղեցու հավատացյալների ու ժառանգների հույսը, ինչի մասին ասում է առաքյալը. «Ուստի, ծառա չես, այլ որդի, և եթե որդի ես, ապա և՝ ժառանգ Աստծո» (Գաղատ. 4:7): Նոր է նաև Եկեղեցու արքայության ավետիսը. «Նրա հետ հարություն տվեց մեզ և Նրա հետ նստեցրեց երկնքում Քրիստոս Հիսուսով» (Եփես. 2:6), ինչի մասին նաև Տերն է ասում. «Եթե մեկն Ինձ ծառայի, Իմ ետևից կգա. և ուր Ես եմ, այնտեղ կլինի և Իմ ծառան» (Հովհ. 12:26): Նոր է նաև Եկեղեցու՝ մեռելների հարության խորհուրդը. «Արդ՝ մի խորհուրդ եմ հայտնում ձեզ. բոլորս էլ պիտի ննջենք, բայց ոչ թե իսկապես բոլորս. պիտի նորոգվենք հանկարծակի, մի ակնթարթում, վերջին փողի ժամանակ, քանզի փողը պիտի հնչի, և մեռելները հարություն պիտի առնեն առանց ապականության, և մենք պիտի նորոգվենք» (Ա Կորնթ. 15:51):
  • Արդ՝ տեսնում ենք, թե Քրիստոս ինչպիսի առատությամբ մեզ այսքան բարիքներ շնորհեց, ինչ մասին առաքյալն ասում է, թե ամեն ինչ նոր եղավ: Եվ այս բոլոր բարիքների պատճառն ու աղբյուրն այս օրն է, այդ պատճառով էլ այն Նոր է կոչվում:
  • Այս օրը Նոր կիրակի է կոչվում նաև խորհրդապես: Թեպետ առաջին միաշաբաթին՝ Հարության Կիրակիին նորոգվեց մեր բնությունը՝ հանձին Փեսայի, սակայն ոչ հանձին Հարսի՝ Եկեղեցու, քանզի Եկեղեցու իշխանները տակավին հնության մեջ էին. ոմանք երկմտում էին, ոմանք էլ չէին հավատում: Այդպիսիներին այս միաշաբաթում Տերը նորոգեց ու հաստատեց հավատի մեջ և նրանց միջոցով՝ Եկեղեցին: Նորոգեց, որպեսզի նոր գինին նոր տիկերի մեջ հեղի, քանզի չի կարելի նոր գինին լցնել հին տիկերի մեջ (տե՛ս Մատթ. Թ 17):
  • Այս կիրակին ունի հետևյալ հատկությունները: Նախ՝ ինչպես կիրակին բոլոր օրերի սկիզբն է ու վախճանը, այնպես էլ այս կիրակին վախճանն է ժամանակի և սկիզբը՝ մշտնջենավոր հավիտենականության: Երկրորդ՝ աներեկո է, քանզի երեկոն սրան չի այցելելու: Երրորդ՝ չունի գիշեր, միշտ ցերեկ է, և սրան այլ օրեր չեն հաջորդելու: Չորրորդ՝ անշարժ է ժամերի, րոպեների ու վայրկյանների համար, այսինքն՝ անժամանակ է:

Կրկնազատիկ

  • Այս օրը նաև Կրկնազատիկ է կոչվում երեք պատճառներով: Դրանք են՝ ազատությունը, հարությունը և փրկությունը: Նախ քննենք ազատության հարցը: Զատիկն ազատություն է նշանակում, և այս օրը կրկնակի ազատության օր է, հետևյալ պատճառով. թեպետ և Քրիստոս մեզ ազատեց մեր մեղքերից՝ Իր առաջին գալստյամբ, սակայն մեր մարմինը դեռ գտնվում է կրքերի ազդեցության ներքո, այսինքն՝ քաղցի, ծարավի, երկյուղի, տրտմության և այլն, ինչպես ասում է առաքյալը. «Մենք իսկ, որ Հոգու առաջին պտուղն ունենք, մենք ևս մեր մեջ հեծեծում ենք՝ սպասելով որդեգրությանը՝ մեր մարմնի փրկությանը» (Հռոմ. 8:23): Իսկ երբ Աստված ամեն ինչ նոր է անում և բոլոր կարիքներից մեզ ազատում, այն ժամ դա կոչվում է Կրկնազատիկ:
  • Երկրորդ՝ Կրկնազատիկ է կոչվում մեր կրկնակի հարության պատճառով: Առաջին կիրակի օրը Քրիստոս մեզ հարություն տվեց Իր Հոգով ու զորությամբ, ինչպես ասում է առաքյալը. «Նրա հետ հարություն տվեց մեզ և Նրա հետ նստեցրեց երկնքում Քրիստոս Հիսուսով» (Եփես. 2:6): Իսկ երկրորդ կիրակի օրը մեզ հարություն է տալու ըստ մարմնի, և մեռելներից հարություն առնելով՝ պիտի անմահանանք: Այդ պատճառով էլ այս օրը կոչվում է Կրկնազատիկ, և մեր կրկնակի հարության օրվա պատկերն է:
  • Երրորդ՝ Կրկնազատիկ է կոչվում մեր փրկության պատճառով: Տերն առաջին կիրակի օրը երևաց աշակերտներին և նրանց հաստատեց հարության հավատի մեջ, իսկ երկրորդ կիրակի օրը երևաց, որպեսզի փրկի Թովմասին թերահավատությունից ու հաստատի հավատի մեջ՝ ասելով. «Բե՛ր քո մատները և դի՛ր այստեղ ու տե՛ս Իմ ձեռքերը. և բե՛ր քո ձեռքն ու մտցրո՛ւ Իմ կողի մեջ. անհավատ մի՛ եղիր, այլ հավատացյալ»: Եվ Թովմասը Նրան պատասխանեց. «Տե՛ր իմ և Աստվա՛ծ իմ» (Հովհ. 20:27-28): Եվ դա օրինակն է երկու տեսակ հավատացյալների: Աշակերտների մի մասն այն հավատացյալներն էին, ովքեր լսելով և հավատի աչքով տեսնելով՝ հաստատվեցին ի Քրիստոս, իսկ Թովմասն օրինակն է երկրորդ տեսակի հավատացյալների, ովքեր Երկրորդ գալստյան ժամանակ սքանչելիքներից և երկյուղից հարկադրված պիտի հավատան՝ ըստ այս խոսքի. «Որպեսզի Հիսուս Քրիստոսի անունով խոնարհվի ամեն ծունկ՝ լինի թե՛ երկնավորների, թե՛ երկրավորների և թե՛ սանդարամետականների. և ամեն լեզու խոստովանի, թե Հիսուս Քրիստոս Տե՛ր է՝ ի փառս Հայր Աստծո» (Փիլիպ. 2:10-11), ինչպես և այսօր Թովմասը, շոշափելով Տիրոջը, Նրան Աստված դավանեց:
  • Դարձյալ՝ Նոր կիրակի և Կրկնազատիկ է կոչվում, քանզի նորովի ենք տոնում մեր հոգու փրկության նավակատիքը՝ հոգևոր ուրախությամբ և տոնախմբությամբ, և ոչ ինչպես հինը, քանզի հնում նավակատիքը միայն մարմնավոր ուրախության համար էր:
  • Այս տոնը հանդիպելու է հետևյալ ամսաթվերին՝  2022-04-24, 2023-04-16, 2024-04-07, 2025-04-27, 2026-04-12, 2027-04-04, 2028-04-23, 2029-04-08, 2030-04-28:

ԱՄՆ - Պանրով ֆոնդյուի ազգային օրը (National Cheese Fondue Day) 

  • Ֆոնդյուն շվեյցարական, իտալական և ֆրանսիական ուտեստ է՝ հալած պանրով, որ մատուցվում է ընդհանուր սպասքով շարժական ջեռոցի վրա և ուտում են երկար պատառաքաղով՝ հացը թաթախելով տաք պանրի մեջ։ Այն Շվեյցարական պանրի միության կողմից 1930 թ. ներկայացվում է որպես շվեյցարական ազգային ուտեստ և 1960-ականներին շատ տարածված էր Հյուսիսային Ամերիկայում։
  • 1950-ականներից «ֆոնդյու» անվանումը ընդհանրացվել և տարածվել է այն բոլոր ուտեստների վրա, որոնք մատուցվում են ընդհանուր սպասքով. շոկոլադի ֆոնդյու, որում մրքի կտորները թաթախվում են հալած շոկոլադի խառնուրդի մեջ և fondue bourguignonne, որում մսի կտորները եփվում են եռացող ձեթի մեջ։
  • Պանրով ֆոնդյուի ամենավաղ հայտնի բաղադրատոմսը գալիս է 1699 թ. Ցյուրիխում տպագրված «Käss mit Wein zu kochen» («Պանիրը եփել գինու մեջ») գրքից։ 

Միջազգային

  • Նացիստական համակենտրոնացման ճամբարների բանտարկյալների ազատագրման միջազգային օրը (International Day of Fascist Concentration Camps Prisoners Liberation) *
  • Շարժանկարողների համաշխարհային օրը *
  • «Լուի-Լուի» երգի միջազգային օրը (International Louie Louie Day) *

Կրոնական և ժողովրդական

  • Կաթոլիկություն - Ծաղկազարդ (Տիրոջ մուտքը Երուսաղեմ) *
  • Հրեական - Զատիկ (Պեսախ) *
  • Ուղղափառություն - Ճշմարտացի Ղազարոսի հարությունը *
  • Սլավոնական - Բերեշչինա *

Ազգային

  • ԱՄՆ - Մանկական մերսման օրը (Baby Massage Day) *
  • ԱՄՆ - Սուզանավի ազգային օրը (National Submarine Day) *
  • ԱՄՆ - Ութուղանի ձայներիզների ազգային օրը (National Eight Track Tape Day) *
  • ԱՄՆ - Ընտանի կենդանիների ազգային օրը (National Pet Day) *
  • ԱՄՆ - Անկախ գրախանութների օրը (Independent Bookstore Day) *
  • ԱՄՆ - Վարսավիրների քառյակի ազգային օրը (National Barbershop Quartet Day) *
  • ԱՄՆ - Բռնել-բաց թողնելու ազգային օրը (National Catch and Release Day) *
  • Լիբերիա - Աղոթքի օրը
  • Կոստա Ռիկա - Խուան Սանտամարիայի օրը (Juan Santamaria Day) *
  • Նիդեռլանդներ - Ծաղիկների շքերթ Ամստերդամում (Bulbflower Parade) *
  • Ռուսաստան - Ռազմածովային նավատորմի քիմիկոսի օրը *
  • Ռուսաստան - Ոչ հմուտ ձեռքերի տոնը *
  • Ռուսաստան - Երեք վիշապների օրը *
  • Ուգանդա - Ազատության օրը

* Տոների մասին մանրամասն

 Նյութը հասանելի է նաև ռուսերեն

 Հավելյալ լուսանկարներ

 Պիտակներ
         Հիշարժան և տոն օրեր, ապրիլի 11

 Նմանատիպ նյութեր


Copyright © 2019 Fon Design created by Fon