ArmenLur

ԱՅՍՕՐ ՀԱՅԱՍՏԱՆՈՒՄ ՆՇՎՈՒՄ Է

Ոստիկանության աշխատողների օրը

• Ապրիլի 16-ին Հայաստանում նշում են Ոստիկանության օրը: 2001թ. հենց այդ օրն ընդունվել է «Ոստիկանության մասին» օրենքը, և ապրիլի 16-ն օրացույցի մեջ մտել է որպես Ոստիկանության օր:
• Ժողովրդավարական հասարակության կյանքում ոստիկանը վստահության և անվտանգության զգացում պետք է ներշնչի: Ոստիկանի վարկանիշն անմիջականորեն կապված է հանցագործությունների և դրանց բացահայտման հետ:
• Ոստիկանը հաճախ նաև կյանքի գնով մեզ պաշտպանում է օրինախախտից, մեր տները՝ հանցավոր ոտնձգությունից՝ կատարելով իր ծառայողական ու մասնագիտական պարտքը:
• Յուրաքանչյուր տարի ապրիլի 16-ին՝ առավոտյան, Հայաստանի ոստիկանության բարձրաստիճան պաշտոնյաները Հաղթանակի զբոսայգում ծաղիկներ են դնում Անհայտ զինվորի հուշարձանին: Այդ օրը լավագույն աշխատակիցները պարգևատրվում են պատվոգրերով:

Կրկնազատիկ (Նոր կիրակի) (Հայ Առաքելական եկեղեցի)

• Այս օրը երբեմն կոչվում է «Նոր կիրակի», երբեմն էլ՝ «Կրկնազատիկ», քանզի նոր և չքնաղ է այդ տոնի խորհուրդը: Նոր է, որովհետև սկիզբն է նոր արարածների: Նոր է կոչվում և գարունը, քանզի հաջորդելով ձմռանը՝ սկսում է արարածների նորոգությունը, և մեռած կերպարանքով ծառերը վերստին ծլարձակում են: Բնությունն ամեն տարի նորոգվում է չորս եղանակներով. գարնանը ծնվում է, ամռանն աճում և հասնում կատարելության, աշնանը ծերանում և ձմռանը մահանում՝ հաջորդ գարնանը վերստին նորոգվելու համար: Դրանով նկարագրվում է մեր հարության խորհուրդը: Եթե գարնանը բնությունը նորոգվում է հնությունից, ապա Եկեղեցին առանց հնանալու է նորոգվում, քանզի Եկեղեցին չի հնանում ու ծերանում, այլ Քրիստոսով կատարյալ է մնում:
• Արդ՝ նոր ասելով նոր կյանքն ի նկատի ունի, քանզի Քրիստոսով ամեն ինչ վերստին նորոգվեց, հինն անցավ և ամեն ինչ նոր եղավ (տես Բ Կորնթ. 5:17): Նոր եղավ նաև Եկեղեցու խորհուրդը, որը հավիտյան ծածկված էր Աստծո մոտ, և այժմ հայտնվեց Իր սրբերին, և Եկեղեցու միջոցով երկնային իշխանություններին ու պետություններին (տես Կողոս. 1:26, Եփես. 3:9-10): Նոր է և Եկեղեցու պատիվը, որի մասին առաքյալն ասում է, որ ուրախ է այն չարչարանքների ու նեղությունների համար, որ կրում է իր մարմնով (Կողոս. 1:24): Նոր է նաև Եկեղեցու պաշտոնը, քանզի ճշմարիտ երկրպագությունն այն է, երբ Հորը երկրպագում են հոգով ու ճշմարտությամբ, քանզի Հայրն այդպիսի երկրպագություն է փնտրում (տես Հովհ. 4:23): Նոր է և Եկեղեցու հոգևոր և վերստին ծնունդը, որը մարգարեն նախապես տեսնելով ասաց. «Ո՞վ է լսել, ո՞վ է տեսել այսպիսի բան, որ երկիրը մեկ օրում ծննդաբերի, և միանգամից մի ամբողջ ազգ ծնվի. քանզի Սիոնը երկունքի ցավով բռնվեց և ծնեց իր մանուկներին» (Եսայի 66:8): Նոր է և Եկեղեցու սուրբ Սեղանի խորհուրդը և փառքը, քանզի այլևս չի ներկվում նոխազների արյամբ, այլ ամբողջովին ներկված է Աստծո Օծյալ Որդու կենարար Արյամբ: Նոր է և Եկեղեցու «պետության» կարգը՝ ըստ այս խոսքի. «Ձեզնից կվերցվի Աստծու արքայությունը և կտրվի այն ազգին, որ պտղաբեր կդարձնի այն» (Մատթ. 21:43): Նոր է նաև Եկեղեցու «քրիստոնյա» անունը, ինչն Աստված նախ մարգարեին խոստացավ. «Իմ ծառաներին նոր անուն պիտի տրվի, որը պիտի օրհնաբանվի երկրի վրա» (Եսայի 65:15): Նոր է Եկեղեցու հավատացյալների ու ժառանգների հույսը, ինչի մասին ասում է առաքյալը. «Ուստի, ծառա չես, այլ որդի, և եթե որդի ես, ապա և՝ ժառանգ Աստծո» (Գաղատ. 4:7): Նոր է նաև Եկեղեցու արքայության ավետիսը. «Նրա հետ հարություն տվեց մեզ և Նրա հետ նստեցրեց երկնքում Քրիստոս Հիսուսով» (Եփես. 2:6), ինչի մասին նաև Տերն է ասում. «Եթե մեկն Ինձ ծառայի, Իմ ետևից կգա. և ուր Ես եմ, այնտեղ կլինի և Իմ ծառան» (Հովհ. 12:26): Նոր է նաև Եկեղեցու՝ մեռելների հարության խորհուրդը. «Արդ՝ մի խորհուրդ եմ հայտնում ձեզ. բոլորս էլ պիտի ննջենք, բայց ոչ թե իսկապես բոլորս. պիտի նորոգվենք հանկարծակի, մի ակնթարթում, վերջին փողի ժամանակ, քանզի փողը պիտի հնչի, և մեռելները հարություն պիտի առնեն առանց ապականության, և մենք պիտի նորոգվենք» (Ա Կորնթ. 15:51):
• Արդ՝ տեսնում ենք, թե Քրիստոս ինչպիսի առատությամբ մեզ այսքան բարիքներ շնորհեց, ինչ մասին առաքյալն ասում է, թե ամեն ինչ նոր եղավ: Եվ այս բոլոր բարիքների պատճառն ու աղբյուրն այս օրն է, այդ պատճառով էլ այն Նոր է կոչվում:
• Այս օրը Նոր կիրակի է կոչվում նաև խորհրդապես: Թեպետ առաջին միաշաբաթին՝ Հարության Կիրակիին նորոգվեց մեր բնությունը՝ հանձին Փեսայի, սակայն ոչ հանձին Հարսի՝ Եկեղեցու, քանզի Եկեղեցու իշխանները տակավին հնության մեջ էին. ոմանք երկմտում էին, ոմանք էլ չէին հավատում: Այդպիսիներին այս միաշաբաթում Տերը նորոգեց ու հաստատեց հավատի մեջ և նրանց միջոցով՝ Եկեղեցին: Նորոգեց, որպեսզի նոր գինին նոր տիկերի մեջ հեղի, քանզի չի կարելի նոր գինին լցնել հին տիկերի մեջ (տե՛ս Մատթ. Թ 17):
• Այս կիրակին ունի հետևյալ հատկությունները: Նախ՝ ինչպես կիրակին բոլոր օրերի սկիզբն է ու վախճանը, այնպես էլ այս կիրակին վախճանն է ժամանակի և սկիզբը՝ մշտնջենավոր հավիտենականության: Երկրորդ՝ աներեկո է, քանզի երեկոն սրան չի այցելելու: Երրորդ՝ չունի գիշեր, միշտ ցերեկ է, և սրան այլ օրեր չեն հաջորդելու: Չորրորդ՝ անշարժ է ժամերի, րոպեների ու վայրկյանների համար, այսինքն՝ անժամանակ է:

Կրկնազատիկ

• Այս օրը նաև Կրկնազատիկ է կոչվում երեք պատճառներով: Դրանք են՝ ազատությունը, հարությունը և փրկությունը: Նախ քննենք ազատության հարցը: Զատիկն ազատություն է նշանակում, և այս օրը կրկնակի ազատության օր է, հետևյալ պատճառով. թեպետ և Քրիստոս մեզ ազատեց մեր մեղքերից՝ Իր առաջին գալստյամբ, սակայն մեր մարմինը դեռ գտնվում է կրքերի ազդեցության ներքո, այսինքն՝ քաղցի, ծարավի, երկյուղի, տրտմության և այլն, ինչպես ասում է առաքյալը. «Մենք իսկ, որ Հոգու առաջին պտուղն ունենք, մենք ևս մեր մեջ հեծեծում ենք՝ սպասելով որդեգրությանը՝ մեր մարմնի փրկությանը» (Հռոմ. 8:23): Իսկ երբ Աստված ամեն ինչ նոր է անում և բոլոր կարիքներից մեզ ազատում, այն ժամ դա կոչվում է Կրկնազատիկ:
• Երկրորդ՝ Կրկնազատիկ է կոչվում մեր կրկնակի հարության պատճառով: Առաջին կիրակի օրը Քրիստոս մեզ հարություն տվեց Իր Հոգով ու զորությամբ, ինչպես ասում է առաքյալը. «Նրա հետ հարություն տվեց մեզ և Նրա հետ նստեցրեց երկնքում Քրիստոս Հիսուսով» (Եփես. 2:6): Իսկ երկրորդ կիրակի օրը մեզ հարություն է տալու ըստ մարմնի, և մեռելներից հարություն առնելով՝ պիտի անմահանանք: Այդ պատճառով էլ այս օրը կոչվում է Կրկնազատիկ, և մեր կրկնակի հարության օրվա պատկերն է:
• Երրորդ՝ Կրկնազատիկ է կոչվում մեր փրկության պատճառով: Տերն առաջին կիրակի օրը երևաց աշակերտներին և նրանց հաստատեց հարության հավատի մեջ, իսկ երկրորդ կիրակի օրը երևաց, որպեսզի փրկի Թովմասին թերահավատությունից ու հաստատի հավատի մեջ՝ ասելով. «Բե՛ր քո մատները և դի՛ր այստեղ ու տե՛ս Իմ ձեռքերը. և բե՛ր քո ձեռքն ու մտցրո՛ւ Իմ կողի մեջ. անհավատ մի՛ եղիր, այլ հավատացյալ»: Եվ Թովմասը Նրան պատասխանեց. «Տե՛ր իմ և Աստվա՛ծ իմ» (Հովհ. 20:27-28): Եվ դա օրինակն է երկու տեսակ հավատացյալների: Աշակերտների մի մասն այն հավատացյալներն էին, ովքեր լսելով և հավատի աչքով տեսնելով՝ հաստատվեցին ի Քրիստոս, իսկ Թովմասն օրինակն է երկրորդ տեսակի հավատացյալների, ովքեր Երկրորդ գալստյան ժամանակ սքանչելիքներից և երկյուղից հարկադրված պիտի հավատան՝ ըստ այս խոսքի. «Որպեսզի Հիսուս Քրիստոսի անունով խոնարհվի ամեն ծունկ՝ լինի թե՛ երկնավորների, թե՛ երկրավորների և թե՛ սանդարամետականների. և ամեն լեզու խոստովանի, թե Հիսուս Քրիստոս Տե՛ր է՝ ի փառս Հայր Աստծո» (Փիլիպ. 2:10-11), ինչպես և այսօր Թովմասը, շոշափելով Տիրոջը, Նրան Աստված դավանեց:
• Դարձյալ՝ Նոր կիրակի և Կրկնազատիկ է կոչվում, քանզի նորովի ենք տոնում մեր հոգու փրկության նավակատիքը՝ հոգևոր ուրախությամբ և տոնախմբությամբ, և ոչ ինչպես հինը, քանզի հնում նավակատիքը միայն մարմնավոր ուրախության համար էր:
• Այս տոնը հանդիպելու է հետևյալ ամսաթվերին՝  2023-04-16, 2024-04-07, 2025-04-27, 2026-04-12, 2027-04-04, 2028-04-23, 2029-04-08, 2030-04-28:

ԻՐԱԴԱՐՁՈՒԹՅՈՒՆՆԵՐ ՀԱՅԱՍՏԱՆԻ ԵՎ ՀԱՅԵՐԻ ՇՈՒՐՋ

2009 - Հայաստանի ազգային հերոս, ակադեմիկոս Վիկտոր Համբարձումյանի հիշատակը հավերժացնելու, ինչպես նաև նրա գիտական ժառանգության զարգացումը խթանելու նպատակով հիմնվեց «Վիկտոր Համբարձումյանի անվան միջազգային գիտական մրցանակը»։
2007 - Ռուսական «02» երիտասարդական հեռուստաընկերությանը տված հարցազրույցում ԲՀԿ նախագահ Գագիկ Ծառուկյանն ասաց. «Մեր ապագան տեսնում ենք միայն Ռուսաստանի հետ»։ 
2004 - Վարդան Օսկանյանն ու Էլմար Մամեդյարովը երկրորդ հանդիպումն են անցկացնում Չեխիայի մայրաքաղաքում:

• Նախարարական հանդիպումների այս շարքը հետո բնորոշվում է որպես «Պրահյան գործընթաց»: «Նախագահների` սովորաբար 2 ժամ տևող հանդիպումներում հնարավոր չէ խնդիրները քննության առնել անհրաժեշտ մանրամասնությամբ»,֊ բացատրում էին միջնորդները, պնդելով, թե նախարարները կարող են մինչ այդ նախապատրաստել գործընթացը:

2003 - Գագիկ Հարությունյանի ղեկավարած Սահմանադրական դատարանը մերժում է ընդդիմության առաջնորդ Ստեփան Դեմիրճյանի դիմումը մարտի 5-ի նախագահի ընտրությունների արդյունքներն անվավեր ճանաչելու պահանջով։ 

• Միաժամանակ նա ոչ հավաստի համարեց ընտրությունների արդյունքները միանգամից չորս տասնյակ տեղամասերում։

2001 - Հայաստանում ընդունվում է «Ոստիկանության մասին» օրենքը:
1990 - «Բժիշկ մահ» Ջեք Գևորգյանը կատարում է իր առաջին էվթանազիան։
1923 - Երևանում ստեղծվեց «Հայֆիլմ» կինոստուդիան։

• Սկզբնավորվեց Հայ կինոն։

1909 - Տարսուս (Կիլիկիա) քաղաքում թուրքերը սկսում են հայերի սպանություններն ու թալանը։

• Հար­ձա­կում Կոզոլուկ գյուղի վրա. 138 մարդ սպանվում է, գյուղը՝ հիմնահատակ ավերվում։

1904 - Իշխանաձորի հայ բնակչությունը նահանջում է Տալ­վորիկ։

• Թուրքական բանակը փորձում է ոչնչացնել նրանց, սակայն համառ դիմադրության և տալվորիկցիների օգնության շնորհիվ թուրքերի հարձակումը կանխվում է։

ԱՅՍՕՐ ԾՆՎԵԼ ԵՆ

1990 - Մանվել Բալոյան (ծնվ. Դամալա, Ջավախք), ըմբշամարտիկ, բանակային ձեռնամարտի մասնագետ
1955 - Գագիկ Ջհանգիրյան (ծնվ. Արարատ), իրավաբան, ռազմաքաղաքական գործիչ
1947 - Արմեն Սանթրոսյան (ծնվ. Երևան), դերասան, ՀՀ ժողովրդական արտիստ
1938 - Արմեն Այվազյան (ծնվ. Ախալքալաք), թատրոնի և կինոյի դերասան

• Նկարահանվել է «Երևանյան օրերի խրոնիկա» (Ռուբեն), «Տղամարդիկ» (Սաքո), «Մենք ենք, մեր սարերը» (Զավեն), «Սարոյան եղբայրներ» (Պապյան) ֆիլմերում:

1933 - Գեորգի Միրզոև (ծնվ. Թբիլիսի, մ. 2018), հայկական արմատներով խորհրդային կոնստրուկտոր, ԱվտոՎԱԶ-ի գլխավոր կոնստրուկտոր, ՌԴ վաստակավոր կոնստրուկտոր
1926 - Հրանտ Զախարյան (ծնվ. Պրոլոմ, Ուկրաինա), «Ղրիմի ողբերգությունը -44» գրքի հեղինակը
1925 - Արմեն Զեմանյան (ծնվ. Բրիջուոթեր, ԱՄՆ), մաթեմատիկոս
1925 - Ժակ Փարվանյան (ծնվ. Փարիզ), գրադարանավար, գրող

• 1947-ին նա ծնողների հետ գաղթել է Խորհրդային Հայաստան։ 1956-ին ԿԳԲ-ի զանգվածային ձերբակալությունների ժամանակ դատապարտվում է զինվորական դատարանի կողմից և ուղարկվում Մոլդովայի ճամբար։ 1960-ին ազատվել է։

1907 - Գեորգի Տեր-Ստեփանյան (ծնվ. Թիֆլիս, մ. 2006), գեոմեխանիկ, գրող
1905 - Գալուստ Գաբրիելյան (Տեր-Գաբրիելյան, մ. 1969), երգիչ (քնարական տենոր), ՀԽՍՀ ժողովրդական արտիստ
1894 - Երվանդ Սահարունի (Երվանդ Տեր-Հակոբյան, ծնվ. Տրապիզոն, մ. 1967), կոմպոզիտոր, ՀԽՍՀ ժողովրդական արտիստ (1964)
1894 - Լև Տեր-Ազարև (ծնվ. Եկատերինոդար, մ. 1973), գործարար

• 1924-ից 1930-ի վերջը եղել է Կուրբևուայի «Պյոտր Սմիռնով» առևտրի տան կառավարիչը (Փարիզի արվարձաններում), որտեղ կառուցել է «Սմիռնովյան» օղու գործարանը՝ Վ. Պ. Սմիռնովի գործընկերությամբ:

1889 - Վահրամ Արիստակեսյան (ծնվ. Էրզրում, մ. 1978), պարուսույց, բալետմայստեր, ՀԽՍՀ արվեստի վաստակավոր գործիչ, բժիշկ

• Նա, դեռևս 1925 թ., Խորհրդային Միությունում առաջինն է կազմակերպել և գլխավորել պետական ազգագրական համույթը, որն արդեն 1928-ին խմբային պարերում առաջին մրցանակն է նվաճել։

1888 - Սոֆյա Վոլխովսկայա-Բեկ-Նազարովա (ծնվ. Սմոլենսկ, մ. 1956), թատրոնի և կինոյի խորհրդային դերասանուհի, ՌՍՖՍՀ վաստակավոր արտիստուհի (1947), հայտնի հայ ռեժիսոր Համո Բեկնազարյանի կինը
1874 - Գաբրիել Տեր-Միքելյան (ծնվ. Ստավրապոլ, մ. 1949), հայ ճարտարապետ, Վրացական ԽՍՀ արվեստի վաստակավոր գործիչ

• Էջմիածնի Զվարթնոց տաճարի վերականգնման նախագծի հեղինակը:

1844 - Անատոլ Ֆրանս (ծնվ. Փարիզ, մ. 1924), հայտնի ֆրանսիացի վիպասան և գրաքննադատ, Գրականության Նոբելյան մրցանակի դափնեկիր (1921), առավել հայտնի հայասերներից է

• «Մի ժողովուրդ, որը չի ցանկանում մեռնել, երբեք չի մեռնի»,- ասել է նա հայերի մասին։

1840 - Ղազարոս Աղայան (ծնվ. Բոլնիս-Խաչեն, Վրաստան, մ. 1911), գրող, լուսավորիչ

• Աղայանը հայտնի է որպես վիպասան, մանկագիր և ժողովրդական ստեղծագործություններ ժողովող։
• Աղայանը կազմել է Մայրենի լեզվի դասագրքերի մի ամբողջ շարք։