ArmenLur

2022 թվականի հուլիսի 5-ին՝ Սահմանադրության օրը, «Դեմոկրատական այլընտրանք» կուսակցություն առաջնորդ Սուրեն Սուրենյանցն ազդարարել է «Նոր շարժման մեկնարկ»՝ գրառելով իր ֆեյբուքյան էջում։

Այսօր խորհրդանշական օր է ու թերևս արժե ընդհանուր ուրվագծերով անդրադառնալ հաղթող ընդդիմության մոդելին, մանավանդ, որ մի կողմից, իշխանության ռեֆորմիստական պոտենցիալը գրեթե զրոյական է, մյուս կողմից` տոտալ ճգնաժամի մեջ է գտնվում խորհրդարանական ընդդիմության ինստիտուտը։

Մի քանի կարևոր արձանագրումներ անենք.

• 2021թ-ի ԱԺ արտահերթ ընտրությունները ոչ թե հաղթահարեցին 2020թ-ի 44-օրյա պատերազմի հետևանքով ստեղծված քաղաքական ճգնաժամը, այլ այն միայն սառեցրեցին։ «Սև-սպիտակի» հակադրության փաստարկումով հանդես եկող ուժերը ձևավորեցին նոր խորհրդարանի խճանկարը, ինչն ինքնին քաղաքական ճգնաժամի մանրակերտն է։
• «Հայաստան» ու «Պատիվ ունեմ» դաշինքների ճգնաժամը չի սահմանափակվելու միայն ընդդիմադիր սեգմենտով, այլ տարածական է լինելու՝ անդրադառնալով նաև խորհրդարանական մեծամասնության, ԱԺ-ի, իշխանության ֆունկցիոնալ կենսունակության վրա։
• Հասարակության զգալի մասն արդեն գիտակցել է, որ Նիկոլ Փաշինյանի ու Ռոբերտի Քոչարյան/Սերժ Սարգսյանի փոխադարձ անտագոնիզմի հենքով ստեղծված քաղաքական համակարգը չի կարող երկրի զարգացման հիմքեր ստեղծել։ Ներքաղաքական հակադրության կողմերից յուրաքանչյուրը քաղաքական անվտանգության երաշխիք,  քաղաքական «թթվածին» է հակառակորդի համար ու արգելակ երկրի զարգացման ճանապարհին։
• անհրաժեշտ է ցանցային սկզբունքով երկրի ողջ տարածքում ծավալել քաղաքական շարժում, որը հիմքեր է ձևավորելու հաղթող ընդդիմության մոդելի գեներացիայի համար։

Ընդդիմադիր շարժման համար կարևոր են.

✓ 2018-ի հեղափոխության օրակարգի, հանրային սպասումների քաղաքական կապիտալիզացիան,
✓ երկրի ամբողջ տարածքում ցանցային սկզբունքով կազմակերպչական կառույցի ստեղծումը, ինչը թույլ կտա միանգամայն դեմոկրատական ճանապարհով ամբողջացնել որակապես նոր ընդդիմադիր հարթակը, հավաքագրել հասարակությանը հուզող խնդիրները ու ներկայացնել համապարփակ քաղաքական օրակարգ,
✓ 1991-98, 1998-2008, 2008-2018 և 2018-22թթ-ի ժամանակահատվածներին առանձին- առանձին քաղաքական գնահատականներ տալը։ Մինչև չձևավորվի ընդհանրական իրավա- քաղաքական գնահատական անցյալի ու ներկայի վերաբերյալ, քաղաքական շարժումը չի կարող զարգացման միասնական տեսլական ներկայացնել,
✓ երկրի մոդեռնիզացիան. այդ նպատակով քաղաքական, տնտեսական, սոցիալական բարեփոխումների փաթեթի մշակումը,
✓ «Հայաստանի Հանրապետության շահն` առաջին հերթին» թեզի կապիտալիզացիան, ինչը ենթադրում է հայ- թուրքական, հայ- ադրբեջանական հարաբերությունների կարգավորում։ Դրա այլընտրանքը ռուս- թուրքական հարաբերություններում մանրադրամ դառնալն ու պետականությունը կոլապսի առաջ կանգնեցնելն է։

«Դեմոկրատական այլընտրանք» կուսակցությունն այսօրվանից ձեռնամուխ է իրական այլընտրանք մարմնավորող ընդդիմադիր շարժման նախաձեռնմանը։

• Մենք դուրս ենք հեղափոխականության, միսիոներականության կարծրատիպերից, քաղաքական գործընթացի վաբանկային պլանավորումներից։
• Մենք չենք դնելու իշխանությունների հրաժարականի, արտահերթ ընտրությունների անցկացման պահանջ, մեր խնդիրն է` մշտապես պատրաստ լինել ընտրություններին` լինեն դրանք հերթական, թե արտահերթ։ Մենք իշխանության ենք հավակնելու բացառապես ընտրությունների ճանապարհով։
• Մենք գնում ենք սեփական էլեկտորալ հնարավորությունները մեծացնելու, այլընտրանքային ծրագրերը մշակելու ճանապարհով։
• Ուրախ կլինենք, եթե օրվա իշխանությունը տարբեր մակարդակներում իրականություն դարձնի մեր այլընտրանքային առաջարկությունները` մարդկանց կյանքի որակը լավացնելու նպատակով։
• Մենք իշխանությանը քննադատելու ենք միայն ծրագրային, արժեքային հիմքով` ընտրությունների ժամանակ հասարակությանը համոզելով, որ մեր թիմն ունի ավելի լավ ծրագիր` արդյունավետ կառավարում իրականացնելու նպատակով

«Դեմոկրատական այլընտրանք» կուսակցությունը հավատում է ընդդիմության առաջարկվող մոդելի արդյունավետությանը ու գործընթացի առաջին փուլի արդյունքները կամփոփի Սեպտեմբերի 21-ին, Հայաստանի Անկախության օրը՝ ներկայացուցչական խորհրդաժողովով։

Մեր հիմքը 88-ի շարժումն է, մեր ուղեցույցը Սեպտեմբերի 21-ի խորհուրդը։

Հ.Գ - բաց ենք համագործակցության համար բոլոր այն քաղաքական ուժերի ու անհատների հետ, որոնք կիսում են մեր արժեքներն ու գաղափարները։