Պատմության հայկական օրը. դեկտեմբերի 30

armenlur / Հայեր 316 / 20:00 / 29.12.2022

ԻՐԱԴԱՐՁՈՒԹՅՈՒՆՆԵՐ ՀԱՅԱՍՏԱՆԻ ԵՎ ՀԱՅԵՐԻ ՇՈՒՐՋ

2004 - Մինսկի խումբը ԵԱՀԿ-ին զեկուցել էր` միջնորդները կողմերին առաջարկել են կարգավորման երեք հնարավոր սցենար, բայց` պատասխան չեն ստացել։

Տարեվերջին ԵԱՀԿ նախագահությանը ներկայացված զեկույցում համանախագահները նշել էին` հուլիսին տարածաշրջան կատարած այցի ընթացքում երկու նախագահներին են ներկայացրել կարգավորման հնարավոր սցենարները՝

♦ որևէ համաձայնագիր չկնքել, ինչը նշանակում է պահպանել գոյություն ունեցող փխրուն «ստատուս-քվոն»,
♦ երկու կողմերի համաձայնությամբ պաշտոնապես «դե-ֆակտո» սառեցնել ներկա իրավիճակը, ինչը նշանակում է հետաձգել Լեռնային Ղարաբաղի կարգավիճակի որոշման հարցը մինչև երկու կողմերի միջև հարաբերությունների կարգավորումը,
♦ համաձայնության հանգել այն բանի շուրջ, թե ինչպես է ապագայում որոշվելու Լեռնային Ղարաբաղի կարգավիճակը, ներառելով նման որոշման պայմանները և այլ պայմանավորվածությունների տարրերը։

Միջնորդները նշել էին, որ կողմերը ժամանակ են խնդրել` «անդրադարձի համար», սակայն, մինչև տարեվերջ այդպես էլ պատասխան չէին տվել:

1991 - Մինսկում ԱՊՀ երկրների գագաթնաժողովը դիմում է Հայաստանին ու Ադրբեջանին՝ խաղաղ կարգավորման շուրջ բանակցությունները վերսկսելու կոչով։

Դեկտեմբերի 10֊ին Ղարաբաղում համաժողովրդական հանրաքվե էր անցկացվել, որտեղ գերիշխող մեծամասնությունը քվեարկել էր անկախության օգտին։
Տարեվերջին արդեն ԽՍՀՄ Ներքին զորքերի հատուկ նշանակության դիվիզան դուրս էր բերվել Ղարաբաղից, ինչն էլ ավելի անկառավարելի էր դարձրել իրավիճակը:

1991 - Ֆինլանդիան, Հարավային Կորեան, Լիբանանը պաշտոնապես ճանաչեցին Հայաստանի Հանրապետության անկախությունը։
1980 - ASALA. Պայթյուն Բեյրութի շվեյցարական «Կրեդիտ Սուիս» բանկի մասնաճյուղերից մեկի առջև։

Հայ Գաղտնի Բանակին մոտ կանգնած «3 Հոկտոմբեր Կազմակերպություն»-ը ստանձնում է պատասխանատվությունը։
1981 թվականի հունվարի 2-ին Հայ Գաղտնի Բանակ (ASALA)-ը հայտարարություն է տարածում, կոչ անելով մինչև հունվարի 15-ը դադարեցնել շվեյցարական հաստատությունների դեմ գործողությունները։

1806 - Թուրքիան պատերազմ հայտարարեց Ռուսաստանին։