ՀՀ արտաքին գործերի նախարար Արարատ Միրզոյանը Մոսկվայում հանդիպում է ունեցել ՀԱՊԿ գլխավոր քարտուղար Ստանիսլավ Զասի հետ։ ՀՀ ԱԳ նախարարն անդադարձել է նաև Լեռնային Ղարաբաղում ՌԴ խաղաղապահ ուժերի պատասխանատվության գոտի՝ Փառուխ գյուղ և հարակից տարածքներ, Ադրբեջանի զինված ուժերի կողմից ներխուժման հետևանքով ստեղծված իրավիճակին: Հանդիպման ընթացքում Ստանիսլավ Զասը ներկայացրել է ՀԱՊԿ գոտում անվտանգության իրավիճակն ու առկա մարտահրավերները և տեղեկացրել ՀԱՊԿ շրջանակներում բանակցվող փաստաթղթերի համաձայնեցման ընթացքի մասին։

Ապրիլի 7-ին, ժամը 21:25-ի սահմանում, Ջալիլաբադի շրջանի Սարխանլի գյուղի մոտակայքում երեք անհայտ անձ Իրանի կողմից խախտել է Ադրբեջանի սահմանը: Սահմանախախտները չեն ենթարկվել կանգառի հրամանին և հրաձգային զինատեսակներից կրակ են բացել սահմանագծի վրա։ Մեկ սահմանախախտ վնասազերծվել է, մեկին բերման են ենթարկել, մեկին հաջողվել է փախչել։ Սահմանախախտին վնասազերծելիս հայտնաբերվել է «Կալաշնիկով» ինքնաձիգ, 24 կիլոգրամ 730 գրամ թմրամիջոց և 300 մեթադոն հաբ։

ՀՀ նախկին վարչապետ Հովիկ Աբրահամյանի՝ Երևանի Ազատության պողոտայում գտնվող շքեղ առանձնատան վաճառքի ու մինչ վաճառքը առանձնատունը քրեական գործով կիրառված արգելանքից ազատելու պատմությունը շարունակում է քննարկումների առարկա լինել։ Բացի Աբրահամյանների ընտանիքին պատկանող առանձնատնից՝ նմանաբնույթ սխեմայով արգելանքներից ազատվել ու վաճառվել են նույն տարածքում գտնվող նախկին բարձրաստիճան պաշտոնյաների հողամասեր ևս։

Ադրբեջանի Պաշտպանության նախարար Զաքիր Հասանովն այցելել է Արցախի օկուպացված Քաշաթաղ և Քարվաճառ շրջաններ։ Նա ստուգել է Հայաստանի հետ սահմանին գտնվող մարտական ​​դիրքերը, ինչպես նաև մի շարք ռազմական օբյեկտներում շինարարության ընթացքը։

ԵԱՀԿ նախագահությունը ողջունում է Հայաստանի և Ադրբեջանի ղեկավարների հանդիպումը Եվրոպական խորհրդի նախագահի հովանու ներքո և հնարավոր խաղաղության համաձայնագրի գործընթացի մեկնարկը: «Նախագահությունը պատրաստ է աջակցություն ցուցաբերել բոլոր ջանքերին՝ ուղղված Հարավային Կովկասում կայուն և խաղաղ միջավայրի ապահովմանը»,-ասված է հայտարարությունում:

Թուրքիայի պաշտպանության նախարար Հուլուսի Աքարը հեռախոսազրույց է ունեցել ռուս պաշտոնակից Սերգեյ Շոյգուի հետ: Կողմերը քննարկել են Ուկրաինայում ստեղծված իրավիճակը: Աքարն ընդգծել է հրադադարի անհապաղ հաստատման կարևորությունը, ինչպես նաև ցամաքային կամ ծովային ճանապարհով խաղաղ բնակիչներին անվտանգ դուրս բերելու հրատապությունը:

2011 թվականի այս օրը Երևանում կայացած հանրահավաքն սկսվեց մատենադարանի մոտից, ապա շարունակվեց երթով և ավարտվեց Ազատության հրապարակում։ Լևոն Տեր-Պետրոսյանն իշխանություններին քսանօրյա ժամկետ տվեց ընդիմության առաջնահերթ պահանջների կատարման համար՝ հայտարարելով, որ այդ ժամկետի ավարտը կդառնա կա՛մ երկխոսության, կա՛մ ջրբաժանի օր։

Վրաստանի արտաքին գործերի նորանշանակ նախարար Իլիա Դարչիաշվիլին ՆԱՏՕ-ի նախարարական նիստի շրջանակներում հանդիպել է ՆԱՏՕ-ի գլխավոր քարտուղար Յենս Ստոլտենբերգի հետ։ Հանդիպմանը նախարարը շնորհակալություն է հայտնել Դաշինքին՝ ՆԱՏՕ-ի նախարարական հանդիպմանը գործընկեր երկրներին, այդ թվում՝ Վրաստանին հրավիրելու համար, ինչը Վրաստանին Դաշինքի աջակցության ևս մեկ ձևերից է։Մտքեր են փոխանակվել նաև տարածաշրջանում անվտանգության միջավայրի շուրջ։

Բրյուսելում ՆԱՏՕ-ի ԱԳ նախարարների հանդիպումից առաջ Թուրքիայի արտգործնախարար Մևլութ Չավուշօղլուն անդրադարձել է Ուկրաինայում վերջին զարգացումներին։ Մասնավորապես, ավելի վաղ Անթալիայում կայացած Ռուսաստանի և Ուկրաինայի արտգործնախարարների հանդիպման մասին Չավուշօղլուն ասել է. «Դա հանդիպում էր, որտեղ նրանք զգալի առաջընթաց գրանցեցին: Բայց, ցավոք, Բուչայից և որոշ այլ շրջաններից մեր տեսած պատկերները փչացրին դրական մթնոլորտը։ Ամեն դեպքում լիահույս ենք և զգուշավոր լավատես։ Ճիշտ է, դժվար հարցեր կան, բայց մենք պետք է շարունակենք մեր ջանքերը, և Թուրքիա անում է ամեն հնարավորը»։

Արցախի բռնազավթված տարածքներում ականների պայթյունից սպանվել է 37 և վիրավորվել 160 ադրբեջանցի։ Ադրբեջանի զինուժը թուրքական բանակի սակրավորների ստորաբաժանման օգնությամբ ականազերծման աշխատանքներ է անում Արցախի բռնազավթված տարածքներում և հարակից շրջաններում։ 2020-ի նոյեմբերի 10-ին ստորագրված եռակողմ հայտարարությունից հետո մինչև օրս ականազերծվել է 23.000 հեկտար մակերեսով գոտի։

ԱՄՆ Ներկայացուցիչների պալատի արտաքին հարաբերությունների հանձնաժողովը հաստատել է Վրաստանին աջակցող օրինագիծը։ Այն ստացել է երկկուսակցական լիակատար աջակցություն։ Ըստ Վրաստանի ԱԳՆ-ի՝ օրինագծի քննարկման ժամանակ վերահաստատվել է ԱՄՆ-ի ամուր աջակցությունը Վրաստանին, հատկապես Ռուսաստանի կողմից Ուկրաինա ներխուժման ֆոնին։

Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը փակ է բոլոր տեսակի տրանսպորտային միջոցների համար։

Հայաստանի վարչապետ Նիկոլ Փաշինյանը եւ Ադրբեջանի նախագահ Իլհամ Ալիևը Լեռնային Ղարաբաղում մարտ ամսին արձանագրված սրացումից հետո առաջին անգամ հանդիպեցին։  Բանակցությունների վայրը դարձել Բրյուսելն էր, իսկ միջնորդը՝ Եվրոպական խորհրդի նախագահ Շառլ Միշելը։ Փորձագետները միաբերան պնդում են՝ ԵՄ-ն հավակնում է Հայաստանի և Ադրբեջանի միջև գլխավոր միջնորդի դերին ՝ հաշվի առնելով, որ Ռուսաստանը Ուկրաինայում «հատուկ ռազմական գործողության» հետ կապված Ղարաբաղի համար ամենևին ժամանակ չունի։

Թուրքիայի նախագահ Ռեջեփ Թայիփ Էրդողանն իր թվիթերյան պաշտոնական էջում գրառել է. «Նախկինում, աշխարհակարգի քաղաքական և տնտեսական վերափոխումների ընթացքում, մեր երկրին միշտ կարողացել են այդ գործընթացներից տարբեր սցենարներով, խաղերով ու ծուղակներով զերծ պահել։ Հուսով եմ, որ այս անգամ մենք նույն սյուժեում չենք հայտնվի։ Մենք թույլ չենք տա, որ Թուրքիան բաց թողնի այս պատմական հնարավորությունը»։

1995 թ. այս օրը ԵԱՀԿ Մինսկի խմբի համանախագահությունը հայտարարություն է տարածում ղարաբաղյան խնդրի վերաբերյալ` կողմերից պահանջելով քաղաքական կարգավորման շուրջ բանակցություններ անցկացնել` առանց նախապայմանների:

Բրյուսելում տեղի ունեցած Նիկոլ Փաշինյանի, Եվրոպական խորհրդի նախագահ Շառլ Միշելի և Իլհամ Ալիևի եռակողմ հանդիպման արդյունքներով ձեռք է բերվել պայմանավորվածություն` մինչև ապրիլի վերջ ստեղծել Հայաստանի և Ադրբեջանի միջև սահմանների դելիմիտացիայի հարցերով երկկողմ հանձնաժողով, որը օժտված կլինի նաև սահմանի երկայնքով անվտանգություն և կայունություն ապահովելու հարցերով: Հայաստանի վարչապետը և Ադրբեջանի նախագահը Արտաքին գործերի նախարարներին հանձնարարել են մեկնարկել երկու երկրների միջև խաղաղության բանակցությունների նախապատրաստական աշխատանքները:

Թուրքիայի արտգործնախարար Մևլութ Չավուշօղլուն հեռախոսազրույց է ունեցել ադրբեջանցի պաշտոնակցի՝ Ջեյհուն Բայրամովի հետ։ Հեռախոսազրույցի ընթացքում քննարկվել են Ուկրաինայում ստեղծված իրավիճակը, ինչպես նաև մտքեր փոխանակվել տարածաշրջանում ստեղծված իրավիճակի և 2020թ. նոյեմբերի 9-ին Ադրբեջանի, Ռուսաստանի և Հայաստանի միջև ստորագրված եռակողմ հայտարարության դրույթների կատարման շուրջ։

Գլենդելի քաղաքային խորհրդի անդամները խորհրդի անդամ Արդաշես «Արդի» Քասախյանին ընտրվել են քաղաքապետ պաշտոնում: Քասախյանը փոխարինել է Պաուլա Դիվայնին։ Քասախյանն առաջին անգամ է զբաղեցնում քաղաքապետի պաշտոնը։

Հարավային Օսիայի Կենտրոնական ընտրական հանձնաժողովը միջնորդություն է ստացել չճանաչված հանրապետության՝ Ռուսաստանի կազմ մտնելու հարցով նախաձեռնող խումբ գրանցելու համար: Նախագահ Անատոլի Բիբիլովը հայտնել է, որ նախաձեռնող խումբը մեկ ամսվա ընթացքում պետք է հավաքի 2000 ստորագրություն։ Նա նաև հիշեցրել է, որ հանրապետությունը կարող է մտնել Ռուսաստանի Դաշնության կազմ որպես սուբյեկտ, որից հետո՝ հնարավոր կլինի հանրաքվե անցկացնել Հարավային Օսիայի և Հյուսիսային Օսիայի միավորման վերաբերյալ։

Երևանի քաղաքապետարանի տարեկան ծրագրով մեկնարկել են Երևանյան լճի մաքրման աշխատանքները: 2022թ. համար բյուջետային մասհանումները կկազմեն 60 մլն 430 հազար դրամ: Դրանով նախատեսվում է Հրազդան գետի վրա ճաղավանդակի տեղադրում, աղբաորսիչ միջոցառումների կազմակերպում: Նախատեսվում է բարեկարգել  լճի ափամերձ տարածքի 2.8 հա հատվածը, կտեղադրվեն նստարաններ, աղբամաններ, կկառուցվի մարզահրապարակ, հեծանվուղի, ճեմուղի: